Desde as súas instalacións centrais en Cantabria, o grupo desenvolveu unha extensa rede de servizo e asistencia técnica que abrangue desde Galicia ata Cataluña, o que a situou como unha das organizacións de referencia dentro da rede internacional de Lely. O que comezou en 2006 coa adquisición da franquía da multinacional holandesa e sen ningún robot instalado converteuse hoxe nun parque de máis de mil equipos repartidos por algunhas das principais zonas produtoras de leite de España.
Detrás deste crecemento atópanse os irmáns Óscar e Telmo Entrecanales, xerentes do Grupo Entrecanales, quen lideraron durante as dúas últimas décadas a expansión da compañía e a súa consolidación coma un dos principais distribuidores de tecnoloxía para o sector lácteo no norte de España.
A distribución actual dos robots artéllase a través de catro Lely Centers, que cobren a totalidade do territorio xestionado polo grupo. O centro de Los Corrales (Asturias, Cantabria e Karrantza) conta con 285 robots en funcionamento; Aizoáin, que presta servizo en Navarra, País Vasco, Aragón e Cataluña, suma 256 unidades; o centro de Trazo (A Coruña) alcanza os 270 robots, mentres que Outeiro (Lugo) lidera a clasificación con 329 equipos instalados.
Detrás destas cifras atópase unha estrutura empresarial formada por 115 traballadores especializados na instalación, o mantemento, a comercialización e a xestión dos sistemas de muxido robotizado, un equipo humano que medrou de forma paralela ao aumento da demanda desta tecnoloxía por parte das explotacións leiteiras.
“Collemos a franquía de Lely en 2006 con cero robots. Desde 2007, cando instalamos a primeira unidade, crecemos unha auténtica barbaridade. En 19 anos, ter un parque de máis de 1.000 robots é algo incrible”, destaca Óscar Entrecanales, xerente do Grupo Entrecanales xunto ao seu irmán Telmo.
Unha expansión ligada ao crecemento territorial
A historia do grupo está estreitamente ligada á súa expansión territorial. Tras os primeiros anos de implantación en Cantabria e comunidades limítrofes, o seguinte gran paso chegou en 2011 coa adquisición da representación de Lely en Galicia, unha comunidade que hoxe constitúe un dos principais mercados de robotización do muxido en Europa pola importancia da súa cabana leiteira.
Una década máis tarde, en 2021, a compañía deu outro salto estratéxico coa incorporación do Lely Center de Aizoáin, ampliando a súa área de actuación a Navarra, País Vasco, Aragón e Cataluña. Esta operación axudou a reforzar a súa posición no nordeste peninsular e abrir novas oportunidades de crecemento en zonas onde a automatización avanza a gran velocidade.
Neste sentido, Cataluña consolidouse coma un dos territorios onde a entidade experimentou unha evolución máis significativa nos últimos anos. Segundo revela o propio empresario, a incorporación da representación de Aizoáin permitiu multiplicar por catro a facturación nesta comunidade entre 2021 e 2025.
O crecemento da compañía tamén se reflicte nos seus resultados económicos. Durante 2025, o Grupo Entrecanales alcanzou un volume de negocio superior aos 40 millóns de euros, unha cifra que confirma o bo momento do mercado da automatización gandeira e a confianza dos produtores neste tipo de solucións tecnolóxicas.
A evolución das instalacións mantén, ademais, unha tendencia claramente ascendente. Durante o pasado exercicio implementáronse 175 novos robots de muxido en todo o norte de España, unha cifra récord para a organización. As previsións para 2026 apuntan todavía máis alto, co obxectivo de chegar ás 240 novas unidades instaladas antes de finalizar o ano.
Servizo técnico e proximidade co gandeiro
Esta progresión obriga a empresa a reforzar de xeito continuo a súa estrutura técnica. A diferenza doutros sectores, a venda dun robot supón o inicio dunha relación a longo prazo co gandeiro, xa que estes sistemas requiren un servizo permanente de mantemento, asistencia e asesoramento técnico.
“Por cada 30 robots instalados sempre necesitamos un novo técnico para manter os equipos. É por iso que a cifra de empregados tampouco vai parar de crecer, porque tan importante é ter número de robots de muxido coma xente que os poida atender”, explica Óscar Entrecanales.
A filosofía da compañía baséase, precisamente, nesa proximidade co cliente e en garantir que os equipos funcionen coa máxima eficiencia durante as vinte e catro horas do día. O éxito da robotización non depende só da tecnoloxía, senón tamén da capacidade de resposta ante calquera incidencia e do acompañamento continuo ás granxas.
“A nosa premisa sempre é a mesma: que os nosos clientes estean contentos, sempre ben atendidos e que as máquinas funcionen á perfección”, engade Óscar.
O crecemento do Grupo Entrecanales é tamén un reflexo da transformación que vive o sector lácteo español. A incorporación de robots de muxido permítelle ás ganderías optimizar a xestión do traballo, mellorar o benestar animal, obter información en tempo real sobre cada vaca e aumentar a eficiencia produtiva. Nun contexto marcado pola dificultade para atopar man de obra especializada e pola necesidade de mellorar a rendibilidade, a automatización converteuse nunha ferramenta estratéxica para garantir a competitividade do sector.
Con 1.140 robots en funcionamento, un persoal en constante expansión e unhas previsións de crecemento que apuntan a novos récords durante 2026, o Grupo Entrecanales afronta o futuro como un dos principais actores da revolución tecnolóxica que está transformando as granxas do norte de España. Unha evolución que comezou cunha única máquina instalada en 2007 e que, menos de dous décadas despois, posicionou á compañía, liderada polos irmáns Óscar e Telmo Entrecanales, nun referente nacional da robotización gandeira.
