As indemnizacións abonadas por Agroseguro aos agricultores e gandeiros asegurados en Galicia polos sinistros rexistrados en 2025 eleváronse ata os 33,2 millóns de euros. Trátase dun novo máximo histórico, ao superar nun 4 % o exercicio anterior.
Os agricultores e gandeiros da provincia de Lugo percibiron algo máis de 15 millóns de euros en indemnizacións. A continuación sitúase A Coruña (11,3 millóns), Pontevedra (3,8 millóns) e Ourense (2,9 millóns).
Por produción, destacan as indemnizacións abonadas aos gandeiros galegos asegurados nas diferentes liñas que cobren os accidentes e as enfermidades do gando vacún. Medran un 7 % respecto de 2024. Ademais, a liña de seguro que cobre os gastos derivados da retirada e destrución de animais mortos alcanzou outros 13,8 millóns de euros.
Por outra banda, a nivel estatal, 2025 pechouse con 804 millóns de euros de sinistralidade, o segundo importe máis elevado e só superado pola excepcional seca rexistrada en 2023.
Segundo o sistema español de Seguros Agrarios Combinados, “estas cifras constatan os importantes efectos dos fenómenos meteorolóxicos e explican a evolución positiva da contratación do seguro agrario, a mellor ferramenta de protección das explotacións agropecuarias”, aseguran.
