Grupo Lence e a EFA Fonteboa inauguraron a Aula Lence, un novo espazo educativo deseñado para fomentar a formación práctica, a innovación e o desenvolvemento do talento xuvenil no ámbito agropecuario galego. O acto contou coa presenza de representantes de ambas entidades, de Fundesar e da Asociación EFA Fonteboa, así como de autoridades locais e provinciais.
Durante o evento, catro alumnos da EFA Fonteboa foron recoñecidos coas bolsas por parte do Grupo Lence, dotadas con 1.000 euros cada unha, en recoñecemento ao seu esforzo e excelencia académica. Estas concedéronse aos estudantes cos mellores expedientes en distintas etapas formativas. A inauguración culminou co descubrimento da placa identificativa da aula.
A Aula Lence súmase así ao programa de bolsas Lence-Fonteboa, presentado o pasado mes de xuño, o que consolida unha cooperación estable entre ambas entidades en favor do desenvolvemento sostible e da remuda xeracional do campo galego.
