Fertinagro Biotech, empresa pertencente ao Grupo Térvalis, foi distinguida co Premio Nacional de Innovación 2025 na modalidade de Gran Empresa Innovadora, un galardón outorgado polo Ministerio de Ciencias, Innovación e Universidades que recoñece aquelas organizacións que integraron a innovación como piar estratéxico do seu crecemento.
O xurado valorou a aposta de Fertinagro Biotech pola innovación como motor de transformación do sector agroalimentario, consolidándoa coma un referente internacional en agricultura sustentable. Entre os seus logros destacan o seu liderado en investigación, que se traduce en 260 patentes rexistradas en 29 países e a colaboración con máis de 120 universidades e centros de investigación. Tamén foi a primeira empresa española en obter a certificación EDP Process para medir a súa pegada ambiental. Ademais, esta compañía desenvolve fertilizantes eficientes, bioestimulantes e tecnoloxías disruptivas como a fixación de nitróxeno atmosférico ou a valorización de residuos gandeiros.
O galardón distingue o labor que a entidade leva a cabo durante máis de dúas décadas no eido da I+D+i, cun investimento acumulado de máis de 35 millóns de euros nos últimos anos, cun enfoque firme cara á bioeconomía, a sustentabilidade ambiental, a descarbonización e o desenvolvemento tecnolóxico, o que lle permite anticiparse aos desafíos regulamentarios e ambientais do sector, sen deixar de mellorar a rendibilidade agrícola.
Generoso Martín Blesa, presidente do Grupo Térvalis (matriz de Fertinagro Biotech), agradece ao Ministerio esta distinción e sinala que "recibir este recoñecemento é unha honra que compartimos con todos os profesionais do campo, cuxo labor é indispensable para alimentar o mundo. A agricultura é un eido de vangarda onde a innovación e a tecnoloxía se alían co respecto ao medio ambiente. Este premio demostra que o agro español está á cabeza da revolución sustentable, e en Fertinagro seguiremos traballando para que así sexa".
