Nanta celebrou onte en Santiago de Compostela o seu III Simposio #RecríaconPrima. Máis de 130 profesionais do sector do vacún de leite acudiron a este novo encontro que a compañía celebra de forma periódica e que tivo como obxectivo principal o benestar das xatas durante a etapa da recría a través da posta en marcha de iniciativas innovadoras.
A recría supón entre o 15 e o 20 % do custo total de produción dunha granxa, por iso resulta clave afondar no manexo dos animais nesta etapa. Consciente diso, Nanta pon a disposición dos gandeiros e veterinarios o método de traballo Prima para a recría de xatas, que ten como prioridade o benestar dos animais e que aborda catro factores básicos: o calostro, a lactación, o destete e os coidados do animal.
O primeiro dos relatores, Leonel Leal, responsable de investigación da nutrición en xatas lactantes en Nutreco, profundou nestes factores, e máis concretamente no impacto do predestete das xatas ao longo de toda a súa vida produtiva, a fase máis importante de todo o ciclo de recría. “A nutrición temperá afecta o metabolismo do animal a longo prazo”- explicou o relator - “influíndo non só nun órgano, senón en todo o sistema”.
A continuación, Santiago García, propietario de Finca La Asunción, expuxo a súa experiencia práctica para a mellora do benestar. En canto ás xatas, o relator explicou o manexo alimentario e hixiénico-sanitario que realizan na actualidade, coa subministración de calostro antes das 2 horas de vida e o emprego da gama de lactoreemplazantes Nantamilk para cubrir as necesidades dos xatos nas súas primeiras semanas de vida. Concluíu a súa presentación cos resultados obtidos coa introdución destes novos procedementos, conseguindo, en termos xerais, un maior desenvolvemento das xatas e unha redución de patoloxías respiratorias.
Pola súa banda, David Otero, xerente de vendas de rumiantes lactantes en Nanta, mostrou os aspectos prácticos no uso de aleitadoras. O relator sinalou as vantaxes de empregar unha alimentación automatizada: “Ofrece a posibilidade de facer distintas curvas de lactación e establecer unhas características fixas do leite en termos de temperatura, concentración e hixiene, ademais de implicar menos mans de obra e poder recompilar datos”.
Para finalizar o encontro, Mark J. Thomas, socio xerente en Dairy Health & Management Services, LLC., centrou a súa presentación nas estratexias de manexo enfocadas a mellorar o benestar das xatas. Partindo duns obxectivos de crecemento establecidos para maximizar a produción, Thomas avaliou as posibles melloras na área de maternidade, e outras atendendo á subministración de calostro, a alimentación e as condicións do medio ambiente, principalmente. Desta forma, en canto ao calostro, do mesmo xeito que o resto dos relatores, incidiu na importancia da inmunidade pasiva, que ofrece “mellores taxas de crecemento, redución en prevalencia de tratamento e mortalidade, diminución da idade ao primeiro parto e aumento da produción de leite na primeira e segunda lactación”.
