Durán Maquinaria recibirá na 43.ª edición da Feira Internacional da Maquinaria Agrícola (FIMA) dous galardóns como Novidade Técnica e Novidade Técnica Sobresaliente polo sistema Ejector da cuba Samson TG 24 e polo remolque autocargador Jumbo 7540 de Pöttinger, respectivamente.
Por unha banda, o novo Jumbo 7540, de Pöttinger, une nunha soa máquina as características esenciais da recollida da forraxe e do transporte. Conta cunha recollida da forraxe limpa e inigualable e unha alta seguridade de uso do seu remolque autocargador.
Destaca tamén pola súa flexibilidade, o volume do remolque de transporte, a exacta calidade de corte e o alto rendemento da picadora. Este equipo foi seleccionado como Novidade Técnica Sobresaliente na categoría de Máquinas accionadas e instalacións fixas e móbiles.
Por outro, a cuba Samson TG 24 é unha máquina para a aplicación de fertilizantes orgánicos líquidos, deseñada para un alto rendemento de traballo e unha óptima xestión dos tempos nos ciclos de carga, transporte e aplicación en finca.
Instala o sistema innovador Ejector, que lle permite unha carga rápida e unha construción un 30 % máis lixeira que máquinas homólogas en volume de carga. Ademais, está dotada dun complexo sistema tecnolóxico baseado en sensores e sistemas de control electrónico, que favorecen a automatización das secuencias de traballo, optimizando a seguridade e axilizando de forma notable os procesos repetitivos. Por todo iso, será recoñecida como Novidade Técnica.
No stand de Durán, cunha superficie de exposición de 600 metros cadrados, exporanse, do 13 ao 17 de febreiro, equipos de Pöttinger, McHale, Pichon-Samson, AGM, DCM, Mastek, MaterMacc e Euromilk.
