Delagro celebrou este mércores a súa Asemblea Xeral anual no Hotel Spa Attica21 de Vilalba (Lugo), onde presentou as contas e a Memoria de Actividades de 2025. A organización pechou o exercicio cun volume de negocio de 271 millóns de euros, nun contexto marcado pola presión sobre os custos, os cambios normativos e a necesidade de reforzar a capacidade de resposta de cooperativas e ganderías.
Durante a Asemblea, o presidente do Consello Reitor, Jesús López Díaz, subliñou a importancia da cooperación ante un mercado cada vez máis esixente. “As explotacións traballan con mercados cambiantes, novas esixencias normativas e custos difíciles de prever. Ante esta realidade, a cooperación xa non é unha opción. É unha necesidade”, afirmou. Neste sentido, defendeu que Delagro debe actuar como unha panca de apoio para as cooperativas, achegando capacidade de compra, respaldo técnico e anticipación ante os cambios do sector.
Un dos aspectos destacados do exercicio foi a reorganización das áreas de negocio, coa creación da Unidade de Subministracións e Puntos de Venda e da Unidade de Produción e Desenvolvemento Vexetal, que agrupa fertilización, sementes, fitosanitarios, ensilado, I+D agronómica e desenvolvemento técnico aplicado. Tamén se puxo en valor o avance de proxectos vinculados á eficiencia e á sustentabilidade, como Pack BLUE, así como o crecemento de DelagrOS, o software de xestión empresarial de Delagro, que en 2025 alcanzou 12 cooperativas implantadas, máis de 25 puntos de venda e máis de 400 usuarios.
A Asemblea abordou ademais a situación do sector lácteo, cun descenso do 0,5 % nas entregas de leite en España e unha caída do 7 % no número de produtores durante 2025, malia o aumento do prezo medio percibido, que pasou de 0,49 a 0,51 euros por litro. Na parte final do encontro formalizouse a renovación do Consello Reitor, con Campoastur na Presidencia, Xallas na Vicepresidencia, Clun na Secretaría e Aira, Agrocantabria, Cusoviame e Valcor como vogalías.
