A Cooperativa Ganadera del Valle de los Pedroches (Covap) entrou no accionariado de Innogando, unha startup galega de innovación tecnolóxica dedicada ao desenvolvemento de solucións avanzadas para a monitorización do gando.
O obxectivo da Covap con este investimento é seguir apostando pola innovación e dixitalización do sector e dos seus socios da man de Innogando e de RUMI, o smartwatch para vacas que desenvolveron e que permite o monitoreo en tempo real do comportamento do animal, axudando a identificar celos, partos, enfermidades temperás, localizacións en áreas extensivas e zonas de parto.
"Innogando, fundada por mozos gandeiros con profundo coñecemento da actividade, desenvolve produtos dixitais que responden ás necesidades reais da gandería moderna, tecnificándoa e facilitando así a vida do gandeiro, achegándolle solucións prácticas e efectivas", destacou Antonio Carmona, director xeral da Covap.
Pola súa banda, Elio López, CEO e cofundador de Innogando, afirma que este acordo confirma a aposta da Covap polo futuro do campo: "Sabemos a importancia que ten a tecnoloxía para mellorar a rendibilidade e asegurar o relevo. Esta alianza permitiranos medrar e desenvolver novas solucións para o futuro da gandería".
