O 6 de xullo de 1885 Louis Pasteur aplicou por primeira vez a vacina fronte á rabia e obtivo un éxito rotundo. Actualmente esa data é a elixida para celebrar, cada ano, o Día Mundial das Zoonose. O obxectivo é concienciar a poboación da necesidade de velar pola saúde dos animais para poder protexer a saúde das persoas.
Segundo a Organización Mundial da Saúde, "unha zoonose é unha enfermidade ou infección que se transmite de forma natural dos animais vertebrados aos humanos". Coa intención de visibilizar a súa importancia, non só en canto á saúde dos animais, se non en canto á saúde global, a Organización Mundial de Saúde Animal (OIE) recorre a datos obxectivos que o poñen de manifesto. Actualmente, ata o 75% das enfermidades que afectan as persoas teñen unha orixe zoonótica. Describíronse máis de 250 enfermidades zoonóticas e indícase que cada ano aparecen cinco novas enfermidades humanas e destas, tres, son de orixe animal. Isto reflíctese tamén a nivel económico, onde as perdas na produción animal mundial causadas por enfermidades transmisibles xa supoñen máis do 20 %. Globalmente, as zoonoses son as responsables de máis de mil millóns de casos de enfermidade en persoas e de millóns de falecementos cada ano.
Ante esta realidade e nun momento no que o camiño cara ao enfoque One Health xa é prioritario, a colaboración entre veterinario e médico convértese en máis necesaria que nunca. "A figura do veterinario na prevención das zoonoses é fundamental. O seu traballo para previr, xestionar e controlar estas enfermidades é unha ferramenta dun valor incalculable en prol da saúde global", afirma Elena Gratacós, directora xerente de Boehringer Ingelheim Animal Health España.
Neste sentido, lembra que "enfermidades como a Covid-19 ou, máis recentemente, as viruela do mono, dan máis visibilidade á relevancia das zoonoses, aínda que é unha cuestión que debería ocupar o foco de forma continua dada a súa incidencia na saúde pública". A colaboración e interacción entre médico e veterinario no ámbito das zoonoses permitiría avanzar en campos como o diagnóstico precoz e o control destas enfermidades. "Deste xeito, daríase un gran paso na implantación real do modelo One Health", conclúe Elena Gratacós.
