A localidade de Santiago de Compostela acolleu o 21 de novembro a oitava edición da Xornada de Veterinarios de ADSG de Galicia. O evento reuniu a 80 veterinarios responsables da sanidade das ADSG de Galicia ao redor de temas de interese técnico que, nesta ocasión, se articularon sobre dous eixes: a vacunoloxía e a enfermidade hemorráxica epizoótica (EHE).
O marco, unha antiga fábrica de papel do século XVIII, foi perfecto para expor o programa desde o papel que xogan os distintos actores na vacinación:
- O papel da vacina e a súa vía de administración
- O papel que xoga o animal e o seu estado inmunitario
- O papel que xoga o veterinario na vacinación
A vacunoloxía
Respecto ao rol das vacinas, o protagonismo foi para dous relatores. En primeiro lugar, interveu Ramsés Raíña (científico titular do CSIC) para facer un repaso á vacinación parenteral. Despois chegou a quenda de Julio Benavides (Instituto de Gandería de Montaña) quen afondou ao redor da inmunidade das mucosas.
Unha vez concluído este bloque emitiuse unha entrevista con Javier Bezos (Universidade Complutense de Madrid) que versou sobre a resposta inmunitaria do animal por exceso ou por defecto.
Finalmente abordouse o papel do veterinario na vacinación desde dous puntos de vista. Javier Heras (DairyProfessionals-Vether Xirona) falou sobre o deseño do plan vacinal e o papel do veterinario á hora de aplicar as vacinas dunha forma correcta. Pola súa banda, Susana Astiz (INIA-CSIC) expuxo as boas prácticas no momento de vacinar os animais.
A enfermidade hemorráxica epizoótica
Xa na segunda parte, o programa sobre a enfermidade hemorráxica captou o interese dos profesionais debido ao momento que atravesamos. Alberto Díez (UCM) foi o primeiro en intervir para facer unha revisión acerca de como está a enfermidade actualmente. Cuestións como cal é a patoxenia, os signos clínicos, o tratamento, o control e a epidemioloxía desta enfermidade, e como foi evolucionando no mundo e en España foron abordados no desenvolvemento do seu relatorio.
Finalmente emitíronse dúas entrevistas acerca da experiencia con esta enfermidade de dous veterinarios de campo. Adelardo Cobos (Veterinarios Fregenal) falou sobre a súa experiencia como veterinario de extensivo en Cáceres e Sergio Santos (Bovitecnia) enfocou o tema desde o punto vista do gando vacún de leite.
Un proxecto con continuidade
En liña co compromiso coa formación da compañía, a xornada cumpriu coas expectativas dos asistentes e deixou constancia da súa consolidación no calendario. O equipo de Boehringer Ingelheim Animal Health España xa traballa na próxima edición co obxectivo de seguir ofrecéndolle contido de valor aos veterinarios da zona.
