Ascol (Asturiana de Control Leiteiro), cooperativa con 556 socios e 40 anos de traxectoria no control leiteiro e na selección xenética da raza Holstein, puxo en marcha un novo portal dixital integrado na súa páxina web (www.ascol.es), que permite aos seus socios acceder de forma inmediata a toda a información do control leiteiro das súas granxas.
O novo portal, operativo desde xaneiro, aglutina a información necesaria para a xestión diaria das ganderías: informes de control leiteiro dos últimos tres anos, censo actualizado de animais, datos de inseminacións e partos, informes de células somáticas e da súa diferenciación (Diceso), datos de cetose, trazabilidade das doses, a lista de touros de Ascol, catálogos e a guía de acoplamentos, entre outros.
"A principal vantaxe deste portal é a axilidade coa que os socios poden consultar os seus datos. Anteriormente, a información enviábase por correo postal, o que implicaba varios días de espera. Agora conseguimos unha comunicación moito máis directa e rápida", explica Mauro Vega, xerente de Ascol.
Os gandeiros poden realizar buscas personalizadas por múltiples parámetros (orde alfabética, crotal, número de rexistro, produción, graxa e proteína) e descargar diversos informes en formato dixital para integralos noutros programas de xestión das súas ganderías. Esta funcionalidade permítelles adiantarse a posibles casos de mastites e cetose, identificar as vacas máis produtivas e tomar as decisións pertinentes na xestión das súas granxas.
