Ascol Genetics foi unha das empresas galardoadas na segunda edición dos Premios Exporta de Asturex, celebrada no Club de Regatas de Xixón. A cooperativa asturiana recibiu este recoñecemento polo seu labor de internacionalización e por levar a xenética bovina Holstein a 30 países dos cinco continentes.
O acto, organizado por Asturex e patrocinado por Caja Rural de Asturias, reuniu empresas, institucións e representantes do tecido económico asturiano. Nesta edición tamén foron premiadas Normagrup e Siluvio Bodegas y Viñedos, tres compañías con traxectorias diferentes pero un obxectivo común: abrirse ao mercado exterior.
O presidente de Ascol, José Emilio García Suárez, recolleu o galardón acompañado polo equipo da cooperativa, ao que agradeceu o seu traballo diario. “Este premio é das persoas que cada día saen ás granxas a realizar o control leiteiro, das que atenden os gandeiros, das que traballan no laboratorio, dos que abren mercados que eran impensables. É dun equipo de 39 persoas que fan que Ascol sexa un referente de xenética bovina en todo o mundo”, sinalou.
Fundada en 1986 e con sede en Asturias, Ascol Genetics exporta seme de touros Holstein de alto valor xenético a mercados de América, Europa, África, Asia, Oriente Próximo e Oceanía. A exportación supón xa case o 50 % da súa facturación e a cooperativa prevé alcanzar entre o 55 % e o 60 % en 2026.
