O 1 de xuño entra en vigor o Plan 2025 de seguros pecuarios, que inclúe 15 liñas de seguro, entre gandeiras e acuícolas. Por esta razón, Agroseguro desenvolverá nos vindeiros días xornadas informativas en diferentes zonas de España.
Na primeira destas sesións, celebrada coas entidades coaseguradoras, Sergio de Andrés, director xeral de Agroseguro, destacou que, tras pechar 2024 cun récord de contratación, o ano 2025 avanza "nas explotacións gandeiras cun 7 % máis de primas totais e un 16 % máis de capitais asegurados".
Lembrou que as liñas de seguros gandeiros supoñen actualmente un cuarto da contratación de seguros agrarios. "É un peso moi importante e cada vez maior", afirmou.
O Plan 2024, cuxo período de contratación remata o 31 de maio, xa supera os 4.778 millóns de euros de valor dos animais asegurados, marcando un récord histórico e medrando un 9 % respecto ao plan anterior.
Entre as principais liñas, a contratación do seguro de vacún de reprodución e produción acada os 1,5 millóns de vacas aseguradas (cifra lixeiramente superior ao plan anterior), e un capital asegurado de 2.085 millóns de euros (+6 %).
O novo plan presenta novidades técnicas nos seguros de gando e outros animais. Destacan as melloras introducidas no seguro de ovino e caprino coa inclusión da cobertura da varíola ovina e caprina na garantía básica das pólizas e a ampliación da protección fronte á Brucella, a Tuberculose caprina ou o meteorismo.
