“Estudo de cuantificación dos baremos cualificativos da biodiversidade nas explotacións de produción ecolóxica de bovinos de leite e carne” é o título da publicación presentada pola Asociación Xeito Rural e que o Consello Regulador da Agricultura Ecolóxica de Galicia (Craega) fixo pública nun evento celebrado onte en Lugo.
Francisco López Valladares, presidente do Craega, inaugurou o acto dando a benvida aos asistentes e presentando a José Luis Cortiñas e Juan A. Pérez, os responsables de elaborar este estudo e de presentalo. Así pois, Juan A. Pérez interveu a continuación facendo unha introdución do artigo, que se centra nos conceptos de agricultura e gandería ecolóxicas e na biodiversidade.
A continuación, José Luis Cortiñas expuxo os datos obtidos durante a fase de investigación para a realización do estudo, na que se analizaron e compararon catro granxas de produción ecolóxica de bovinos, dúas de leite e dúas de carne: A Cernada (Palas de Rei, Lugo), María Elvira Diéguez García (Montederramo, Ourense), Bernardino González Pena (Monfero, A Coruña) e Casa de Vázquez (O Corgo, Lugo).
Unha das conclusións ás que chegaron foi que as explotacións colaboradoras reflicten fielmente o papel positivo que exerce o gando no territorio. A actividade gandeira preserva os hábitats e os recursos alimentarios para a fauna, ademais de ser imprescindibles para a flora. Outra das conclusións acadadas é que o gando, cun manexo correcto, mantén a durabilidade do chan axudando á calidade das augas.
José Luis Cabarcos, o director xeral da Axencia Galega de Calidade Alimentaria (Agacal), clausurou o evento coa súa intervención.