A primavera xa está aquí e con ela chega o número 58 da revista Vaca Pinta. Dedicamos un amplo especial á sementeira do millo forraxeiro, un cultivo clave nas ganderías de leite, analizado desde diferentes perspectivas técnicas e prácticas. En 'A voz do técnico', uns vinte profesionais anticipan os retos da colleita en 2026, con especial atención á meteoroloxía, a normativa e a toma de decisións no campo.
A remuda xeracional cobra protagonismo a través da Xornada Técnica Africor Lugo-Vaca Pinta, con mozos gandeiros compartindo experiencias reais, e a entrega de premios a traballos académicos no ámbito vacún. Ademais, falamos cos veterinarios Rubén López e Patricia de Celis sobre a incorporación de mozos ao sector e os avances na vacinación contra a mamite.
'Na Granxa', visitamos a Ganadería Lobeiro, en Melide (A Coruña), un exemplo de modernización con muxido robotizado e aposta pola xenética. Por último, inauguramos a sección 'A debate', onde queremos saber a vosa opinión, neste caso sobre as medidas ante a dermatose nodular contaxiosa.
